من خواطر عانس

أهلاً بكل البنات العوانس وغير العوانس وحشتونى من المره اللى فاتت
النهارده حبيت أتكلم معاكم عن بداية العنوسة ...

وهبتدى معاكم من بعد التخرّج وإنتِ فرحانة إنك خلاص إتخرجتى وهتشتغلى قصدي تبتدى تدوّرى علي شغل وإن شاء الله هيبقى ليكي دور فى المجتمع والحياة ومش هتبقى عالة على حد وهتبقى شخص إيجابي ،  إذ فجأةً يبتدى الأهل يقولوا لازم تبتدي تفكري جدياً فى الزواج وتشوفي العرسان اللى بيتقدمولك وقت الدراسة ماكناش بنضغط عليكي علشان  تركزى فى دراستك إنما دلوقتى خلاص بقي إحنا عاوزين نفرح بيكي- علي أساس إن الفرحة مقتصرة علي الزواج بس-ومن هنا تبدأ المعاناة.

من المفترض إن اللى يجي يتقدم يكون مناسب ليكي اجتماعياً وثقافياً لكن اللى بنتصدم بيه فى الواقع غير كده طبعاً وأكبر مثال على اللى بنعانى منه مسلسل عاوزه أتجوز كلنا اتفرجنا عليه بس فعلاً لمس حاجة جوّانا وكان فيه أمثلة كتير بنشوفها  وقابلناها واتقدمولنا بالفعل.

هحكيلكم على حاجة حصلت معايا  اتقدملى واحد تعليمه أقل وثقافته أقل وفى أول مقابلة عندنا فى البيت أول مره أشوفه لقيته بيقولّى : " إسلوب لبسك ده ما ينفعنيش ومش عاجبنى " و ده كان فى حضور أهلى طبعاً و كلهم عندهم ذهول واندهاش زى بتاع فريسكا كده J وأكيد يعنى مش محتاجين تعرفوا اللى حصل ، توقعوه إنتوا بقى
ودى كانت أول وآخر مرّة أشوفه فيها الحمد لله.

إنتوا عارفين إيه اللى بيضايقنى جداً إن أى راجل مهما كان غير متعلم أو غير مثقف أو فيه العبر زى مابنقول بيبقى فاكر إن أى بنت هتدوب في هواه وإن هو غير قابل للرفض ، بجد نفسى أفهم الثقه دى إزاى عندهم وإزاى مش حاسين بنفسهم
ياترى دى غلطة مننا لأن فيه بنات كتير بتتنازل عن أشياء أساسية مقابل حاجات تانيه زى الوسامة او الفلوس ؟!؟!

الحقيقة مش قادرة أعرف مصدر الثقة ..

المهم نكمّل مشوار العنوسة وبعد ما اتخرجتى هتبتدى تشوفى العرسان ومع كل واحد يبتدى نفس الحوار
ماما : حبيبتي جايلك عريس يوم الخميس – ومش عارفه إيه السر فى اليوم ده – ولازم تلبسى حاجة شيك وتبقى زى القمر ولما تدخلى تبقى مبتسمة وتقعدي هادية وتشوفى العريس كويس وتسمعيه وهو بيتكلم وماتتسرّعيش فى تكوين رأيك عايزاكى تاخدى وقتك
البنت : حاضر يا ماما J

ويجي اليوم الموعود وتلبسى أحلى حاجة عندك علشان ماما وتبقى فعلاً قمر ويجي عريس الهنا
وتدخلى تشوفى العريس واّن اّن اّاّاّاّاّاّاّن أكيد أكيد صدمة ولو طلع شكله كويس اصبرى ماتستعجليش إستنى لما يبتدي يتكلم  وهتلاقى إن شكله الحلو سقط بسرعة الصاروخ
وهتبقى قاعدة وإنتِ مضطرّة بس الإتيكيت والأدب هيمنعك تقومى برغم أى حاجة وكل حاجة مضيقاكى ولما يمشى العريس بقى يبتدى التحقيق والاقناع ..
ها إيه رأيك شكله كويس وابن حلال إحنا مش بنضغط عليكي بس عاوزين نعرف رأيك المبدأى
هتبتدى تقولى على العيوب والأهل يقولوا بلاش تلاكيك دى حاجات سطحية بس يا ناااااااااااااااس والله مش سطحية ده المفروض إن ده الشخص اللى هعيش معاه باقى عمرى وهيبقى أبو ولادى يعنى لازم يكون شخص أنا مقتنعة بيه من كل الاتجاهات
وتفضلوا فى مفاوضات لحد يوم الرد على العريس وطبعاً إحنا بننتصر فى النهاية

بس بيتقال علينا بعد الخبرة والسنين من مقابلة العرسان إننا طالعين فيها وعمرنا ماهنتجوز وهنبقى عوانس

وأنا من موقعى هذا أحب اقولهم
أيوه أنا عانس وأفتخر ....  نرمين ابراهيم