مش كلام والسلام

 زي ما اتفقنا من العدد اللي فات إننا عايزين نتكلم إزاي أخلّي حياتي جميلة مع حبيبي ، بس إيه رأيكم نتكلم الأول عن مين الشخص اللي يستاهل ! قلب البنت مين اللي يستحق قلبي وتفكيري  قبل ما أختاره؟!

كتير مننا كبنات بقي عادي جداً نقول أنا مرتبطة وهتخطب قريب وده مش غلط أو اعتراض منّي على ده ، بس لو بيحبني هيثبت ده ، لو بيحبني مش هيقول ظروف وجوابات ! لا ، هيخاف عليّا قبل مايقول الكلمة ، هيخاف عليّا من كلمة من نظرة غلط من أي حد ! يمكن بجد تكون الظروف مش هتسمح في الوقت الحالي إنه يتقدّم ويوفّر مطالب الزواج ، يبقي لازم يحافظ عليّا كبنت في مجتمع شرقي له عاداته وتقاليده ، بمعني ليه أخرج معاه ؟ ليه يكلمني على التليفون 24 ساعه ؟ ليه أدخّله في حياتي بعمق وأخلّيه يتحكم فيّا ؟ الإجابة بسيطة ,  هو أصلاً مش خطيبي عشان يكون له كل الحقوق! وبعيداً عن العادات والتقاليد والصح والغلط ، لو استخدمنا دهاء الأنثي ، أنا لو اديته كل الحقوق خلاص هيفكر ليه ف خطوبة ومصاريف ! ماهو بيخرج ويتكلم وبيحب ببلاش ومش بيخسر حاجة إنتي بس اللي بتخسري ، بتخسري وقت ومشاعر وقلب هينجرح. لو في الآخر قال ظروف ، يبقي الحاجة اللي بتعب علي ما أوصلّها هي اللي عمري ماضيعها من إيدي ، وده مش كلام وسلام ده واقع لو فكرنا فيه بجد عمرنا ماهنتعب . اللي هيحبني مش هيربطني بيه وسايبني أستنّي شهر ورا التاني والتالت وهكذا يبقي أخليني صعبة عليه عشان يعرف إني غالية أوي مش سهل يوصلني! ليه مش بنفكر إن معظم الشباب في الوقت الحالي يعرف بنت و 2 و 3 وفي الآخر يطلب من والدته إنها تختار له العروسة عشان وقت ماهيحب يفتح بيت هيكون عايز يحافظ عليها وداخل البيت من بابه.

وطبعا ماقصدتش إني أقول إنه صح ، لا هو غلط 100 مره بس أنا غلط 1000 عشان سمحت إن ده أصلا يحصل وحد يلعب بيّا وخليلته كل حاجة سهلة عشان يفكر إني سهلة أنا كمان ، فيروح لواحده تانية ، ووقتها أكيد مع الف ... سلامة أكيد J

بس أنا هخسر قلبي انجرح وانكسرت وتعبت وهبدأ أشك في كل الناس وكل الرجالة ، ما أنا أبعد عن أي خساره وأي دموع تنزل منّي وأخليني غالية أوي ع أي حد يعرف إني جوهرة مش سهل ياخدها من غير أما يتعب عشان يوصلها ، يبقي أكيد ال بيحبني هو ال هيدخل بيتي من بابه هتعرّف عليه وسط أهلي ، هخلّي كل حاجة في النور بدل ما أخاف ماما تسمعني أو بابا وأنا بكلم ،أخاف أخويا يشوفني وأنا بقابله ، أخاف حد يفتح موبايلي عامله باس ورد .

يبقي لايصح إلا الصحيح ودايماً أكرر وأقول (لست ابنة سلطان لكن ابنة رجل علمني أنني كالملاك يستحقني رجل ليس ككل الرجال)

/

سمر أحمد

Posted in: بنوتة بضفيرتين