أرض النفاق

    يقول أمير الشعراء أحمد شوقي في أحد قصائده:

و إذا أُصيب القومُ في أخلاقهم    فأقم عليهم مأتماً و عويلاً

و انطلاقاً من هذا المبدأ خلينا نشوف هنعمل إيه، سواء في الأصوات العالية اللي طول الوقت بتنادينا إن إحنا نستسلم، أو في الناس اللي بتكبّر و تصقّف على أي حاجة !!

تعرف محمد ؟؟ آه دا واد حلو و ظريف و لطيف، إنت عارف أنا بتكلّم عن محمد مين ؟؟ لأ بس كل اللي اسمهم محمد حلوين.. دا العادي، في ناس بتفتي و السلام، ممكن يتقال عنك ابن حلال و ممكن بعدها بلحظة يشتموك بأبشع الألفاظ !!

بُص في عينيهم هتلاقي دايماً حاجة محيّراهم، حتى لو مبسوطين فـ ورا الضحكة دي ميت سؤال و سؤال !! و عشان إحنا طيبين بنصدّق أي كلام !! لو اتقال لنا إن كل الدكاترة حرامية هنصدّق، و لو اتقال لنا إن الإخوان هم الأغلبية في البلد بنصدّق، بنصدّق من غير ما نفكّر مين له مصلحة يلغي تفكيرنا و يضحك علينا، مين له مصلحة يناقضنا و يكدب علينا !!

يمكن عشان اتعوّدنا على كدا، فكل حاجة بالنسبة لنا بقت عادي، إنّك تبيع حتّة من جسمك عشان تعيش..عادي، و إنّك تبقى في حياتك زي الطور في الساقية.. عادي، و إن كل مسئول يطلع يتكلّم بصوت عالي ..عادي، و إن شويّة أطفال يموتوا و هّمَ رايحين مدرستهم عشان يتعلّموا تعليم زي الزفت..عادي !! و إنّك تلبّس القضية  لواحد تاني و تنسى الأصل..برده عادي !!

دا اللي اتعوِّدنا عليه من أي نظام يُحكمنا، التسيّب و انعدام المسئولية و مش هبالغ لو قلت ملوخيّة !! اللي بيطالب بحقّه ملوش ديّة، و اللي يموت في مُظاهرة  بقى مصيره مجهول، إمّا نسكت عن حقه أو نستنى لمّا الناس إياهم يطلعوا يقولوا إنهم " شُهداء " !! دا اللي اتعوّدنا عليه في الفترة اللي فاتت، و عشان تكون في الصورة دا اللي هنفضل عايشين بيه لسنين قدام !!

 لو هنتكلّم عن الحوادث و الناس اللي بتموت، مش هنخلص؛ لإن طول الوقت في حوادث، و دلوقتي الحوادث بقت ع الموضة !! يعني بيموت فيها أطفال دون العاشرة، و دا تقدّم ملحوظ لازم كلنا نفتخر بيه، طالما مش لاقيين حاجة حلوة نتفشخر بيها !!

 مش مهم مين المسئول و لّا مين السبب في الحوادث دي، هات الغلبان مع المسطول و ابعد خالص عن البيه؛ لإنّه له " ضهر " و اللي له ضهر مينضربش عليه !! سواق نايم في محطّة و لاّ وزير نايم في التكييف، مش فارقة كتير؛ لإن مفيش حساب و كله ماشي بالكيف !! و بعدين إيه يعني لمّا كام واحد يموت ؟؟ هيحصل إيه أكتر من إن العمر هيفوت ؟؟ كان هيحصل إيه لو القطر كان قال توت !! كان زمان كل حاجة ماشية و مكنش هيكون له لازمة النبّوت !!

كلّه بيضحك على كلّه، و في الآخر الكل مبسوط، بنحب دايماً اللي يخرّجنا من همومنا أو يضحك علينا سواء بشويش أو بعلو الصوت !! اضحك عليّا كمان و كمان، و علّي صوتك يا  عم الكتكوت !! هنعمل أفلام و برامج بتعبّر عن واقع المواطن، و هننزل العشوائيات بكل ما فيها من مآسي، و هنجيب ممثلين يقبضوا ملايين و هُمّ قاعدين ع الكراسي !! و لو حد اتكلِّم قولّه : " و إيه اللي يزعّل، دا أنا بمسي التماسي " !!

كل واحد مش شايف غير نفسه وبس، و مصلحة الناس بالنسبة له شيء عادي، ماشيين بالفهلوة و الضحكة الصفرا اللي بنسرق بيها كل غالي !! قدام فلان قول فيه شِعر، و بعد ما يمشي قول عليه كلام تاني !! محدش هيحاسبك طول ما إنت في حياتك أناني !! مش فارقة معايا صورتك حتى و لا شكلك الجواني، و مصلحتي هاخُدها؛ لإنها عندي شيء عالي !!

عارف ليه الكدب بقى في حياتنا شيء عادي ؟؟ و الكدب و الخداع و المكر بنسمّيهم" فهلوه " و دا برده اعتيادي !! و إنّك تنكر وجود غيرك حتى لو كان سامي !! و إن الحقيقة بنخاف منها و من أي حد ارتجالي !! و إن المكتوب ع الجبين بقى للعيون شيء بالي !! عشان الحقيقة يعني مسئوليّة، و دا بالنسبة لينا أكبر المآسي !! الناس بتهرب م المسئوليّة، و عن الحق يتقال خيالي !!

ممكن تقول عليها " أرض النفاق "، و ممكن في بعض الأحيان تبقى مجرّد أنفاق !!دي مش مجرّد خواطر، دي أكتر من مستنقعات !! دي أرض فيها كل حاجة وحشة، و إحنا اللي بإيدينا زرعنا اللي فات !! زرعنا الكدب و الغش و الخيانة، و بقى الحب و الأمل و الصدق مجرّد ذكريات !! ذكريات بياخدها معاه كل واحد ساب الدنيا دي و مات !! و زرعة الشوك هتفضل مستمرّة، ما أنا قولتلك انسى اللي فات !!

 مش معنى إنها " أرض النفاق "، فكل اللي عليها وحشين، بالعكس في منهم كتير طيبين، بس للأسف التانيين مسيطرين !! كل واحد فيهم بيتعامل بـ " وش " ، و عشان الوشوش كتير سهل عليك تكون الأمير، سنة..اتنين... مهما طالت السنين، فأكيد في يوم أقنعته هتلين، و لمّا تقع هتشوف بعينك كل واحد كإنّه أسير !!

 الحل إن كل واحد يتعامل بضميره، و إن الأخلاق تكون للبيع، و لمّا فايزة تقول لـ سُمعَه " يا حلاوتك يا جمالك " تعرف ساعتها إنها كانت تقصده من جُوّاه، و لو إنت زيي بتعاني، بص في المراية و اضحك لنفسك، و قول إن كل حاجة هتبقى تمام، بس بشرط إن كل واحد يبقى نفسه، و مصلحة الناس بالنسبة له متكونش كماليات !!

  دوّر في نفسك هتلاقي عيب..حاول تصلّحه، كلنا زيّك، بس الجميل إنّك تعرف تغيّره، و حتى لو كان الناس بيتعاملوا بحقارة، خليك بطيبتك و حلاوة روحك عايش بحرارة، و لو في يوم حاولوا يكسروا شوكتك، ازرع في نفسك الصبر و العزيمة و القدرة على الإنارة، و لو زعلان إن المحترمين بيخلصوا، خليك إنت بنورك شعاع يفجّر ابتسامتهم اللي مليانة حقارة !!

 لو بتعاني في حياتك، و شايف إن الناس يهمهم المنظر أكتر م الجوهر، فخليك فاكر إن مش الحل إنّك تكون واحد منهم، بالعكس خليك التغيير اللي في يوم هيفرض رأيه من غير صناديق !! ما تيأسش حتى لو كنت لوحدك، فرغم ذلك ..ربك مبينساش حد !!

 هتلاقي من المنافقين و من أصحاب الوشوش اللي بتتغيّر كتير، بس إوعى تخليّهم يغيّروك، خليك بطيبتك و سماحة روحك و اتعامل معاهم كإنك بريء، و لو في يوم ضايقوك قولّهم : " إن معي ربي سيهدين " !!

/

أحمد سعودي

Posted in: تفجيرات اجتماعية